سوالف x سوالف

السلام عليكم

كيفكم يا معاريف عساكم بخير


وكيفكم مع الأجواء الروعة والأمطار الأروع


الجو خطير ويجننننن وما أحلاها بعد العيد من يمسك خط ويتجول في البراري

اعشق المشي لمسافات طويلة والتأمل في البر

من جد الافكار تطلع معاك اوكي ولا احلى منها ويجيك الهام شعري او نثري

واكثر هواية احبها اني اقطف الازهار واعملها كقلادة والبسها البنات اللي معي الصغار

سبحان الله الحظ في البر ان الشاهي والقهوة لهم طعم خاص ورااايق



أذكر لما نروح نخيم في البر في الربيع مع عماني


أمشي مع مجموعة من بنات عمي وفجأة يقولون تعبنا بنرجع

وأقول تخلوني بلحالي مايصير يقولون أرجعي معنا أقول لا

وأتصل على أخوي تعال أبغاك ضروي ضروري ويجي ياقلبي عليه

مسكين متحمس يحسب فيني شيء وفي الاخير اقول خل نتمشى سوى

يقعد يتحلطم حبتين وبعدين اقوله شف الجو العليل بالله وش احسن تلعب بالخيمة ولا تتمشى وتسولف مع اختك يعني يرضيك امشي بلحالي وبعدها يرجعون البنات وأمشي مع أخوي
صحيح ان سوالفه تغثني كلها عن الكورة والهلال وترافيان والبلياردو بس اهم شيء انه معي



عاد تدرون أن بنت ولد عمي الصغنونه أسمها (سديم) عمرها 9 سنوات وهيا في صف رابع
هذي تحب المشي مثلي لذا مرات أسحب على البنات وأمشي معاها عشانها تكمل المشوار معي
وما تقول تعبت نمشي ونسولف ونوقف عند شيء نتأمل وأذا طاح اللي براسي رجعت انا وياها



ومرات وانا امشي انسى نفسي وابعد كثييييييييير عن المخيم وهبلت باهلي وهم يدوروني
وهم خايفين علي وانا مبسوووطه وفي النهاية صدر قرار صارم ممنوع امشي لوحدي


صرت اسحب سديم معي ولا اخوي محمدولا مرت عمي هذولا اكثر ناس ما يتضايقون مرره من المشي الكثير


بس لازم تعرفون انا احب المشي لمسافات طويلة بس فترة الصباح من بزوغ الفجر حتى بدء قوة اشعة الشمس وحراتها وكذلك فترة العصر وحتى قبيل الغروب فقط


الليل اخاااف امشيبسم الله علي ظلااااام


الليل احب اجلس عند السمر والنار ونجتمع سوالف وفله ولا احلى من كذا



كل ذي الهذره عشان الجو عندي خيال وفاتحة الشباك وتذكرت الربيع والبر




المهم عندي لكم سولافة ثانية



اليوم أتصلت على صديقتي (منى) وحكت لي موقف صار مررره فضيييع



تقول لي ( أنها راحت راحت تتغدى عند عمتها وتسلم عليها مع أمها وفله و وناسه
بس فجأة بعد صلاة العصر سمعنا أزعاج وهيصة برا في الشارع طلعوا عيال عمتي يشوفون وش المشكلة
صار واحد من الجيران طاعن ولد الجيران الثانيين))

يعني بسهوله كذا اذا الوحد تهاوش مع أحد ماتعوق معاه يرفع السكين ويطعنه!!!!!
وين أحنا فيه !!! مره ضاق صدري وانقهرت والله


تقول لي بنت خالي (( أن هذولا الأثنين طلاب في جامعة الأمير سلطان ودوم بينهم مناوشات بالكلام
وفيه أحتكاك بالفاظ بينهم ..طبعا واحد دوم يهايط والثاني يسكت ويتغاضي بس لما وصل وسب امه
ولعنها الثاني ماتحمل وقال له تسبني اتغاضى واطنش بكيفي لكن تسب امي لا والف لا..
عاد الثاني قال الوعد بعد الصلاة..وبعد الصلاة الاول نسى الموضوع وصلى ورجع يبغا يشغل سيارته
ويركب وفجأ يجي الولد الاول ويرفع السكين بيطعنه على ظهره!!!
أبو الجيران القريب شاف هذا وركض مسك يد الولد عشان مايغرس السكين بس ماااش السكين جرحت
ظهرة وملابسه أمتلات دم واتصلوا للشرطة واحد راح للمستشفى والثاني راح للشرطة))



لماحكت لي صديقتي السالفة مره انقهرت وحسيت أن الأفلام والفضايئات لها دور في زرع هذا السلوك
في الشباب!!! لا حول ولا قوة الا بالله




تصدقون كنت بسوالف سولافة ثالثة بس تاخر الوقت وبطلع اضبط شغلات قبل ما انام

تصبحون على خير