حامد زيد - صح النوم

تعودنا على حمل الجمايل والزعل واللوم = ولانرفض عتب غالي ولانزعل من جداله
تمنينا نحوز اغلى مكانه في وجيه القوم = ونعيش الخوه بوقت يضد رجاله رجاله
تعلمنا من الدنيا وزدنا للعلوم أعلوم = وسقنا للدروب قلوب رجليه وخياله
وقفنا للزمن وقفة شجاعه والقروم قروم = الين صار واحدنا بديل اقواله افعاله
الى منه خذا ياخذ مثل ماياخذ المحروم = ولا منه عطى يعطي ولو من لقمة عياله
ولابتنا ولو باتت رحايلنا بدون عزوم = نساوم للفخر بأرضه ولو بأي من اشكاله
ولاعفنا ولو شفنا على باب النهار سموم = ولاخفنا ولو طفنا بمخراجه ومدخاله
واذا شفنا عناقيد العنب فوق الشجر ملموم = نهز غصون عنقوده واذا ماطاح نرقاله
نصبر بعضنا بالكذب الابيض والهدف معدوم = ونقول انا وصلنا له لو انا ماوصلنا له
وانا واحد من اصغرهم طموح وللطموح رسوم = على وجي مثل قولة بغى شي ولا ناله
عطيت ولارضيت اخذ من سلوم البخيل سلوم = ولاعمري رضيت اقعد على قلب العرب عاله
ولا ارضى بالفخر فزعة جواسيس وكلام رخوم = ولاعمري حنيت الوجه بعد المجد لحثاله
غناي الله وانا رجل عزيز مقدر محشوم = قنوع بالقدر وان قلت فال الله ولا فاله
بسيط يرمي حموله على متن الجبال هموم = بوقت للأسف عيت تطيق همومه جباله
بوقت نزل خشوم ورفع من رداه خشوم = وخلى قيمة الرجال بين الناس برياله
صحيت وقلت للنايم بعد ماقام ( صح النوم) = زمانك ماعطاك الا صور وحطام تمثاله
سنين اطالع البارق واقول ان المطر محتوم = وهو مامد لي كفه وانا ماطلت هماله
ارد اكذب على نفسي واقول ان النخل مفطوم = وهو مابالنخل عذق عطش ماذاق شلاله
وانا مابي من البارق هماليل ومطر وغيوم = ولو ذقت العطش بعيون طرقيه ورحاله
تعلمت الصبر من كنت طفل بالمهد مزموم = الين صرت رجال لا انتخوا به طوح عقاله
وانا ما احلف بعد عمر طويل بدفنة المرحوم = بقول الله ولاغير الله الرحمن نلجا له
مثل ما بالمطر خوه الى من هل كوم وكوم = انا قلبي بعد يقدر يدك البيد بلحاله
واذا اسمي واصل الدنيا قبل لا القى الحياه بيوم = ابتركها وانا اسمي يضرب التاريخ بأمثاله
واذا ربعي وهم ربعي تناسوا حقي المهضوم = بعيش اشره على قلبي قبل ارثي على حاله
واذا كفي طعن كفي برا الخنجر المسموم = بعرف ان النصيب اقرب من الرجال لظلاله
مدام ان الزمن خلا الشجاع بوقتنا مهزوم = اجل خلوا ضعيف النفس يقضر شره اشواله